اسم لله كله امل وفرحه

بسم الله الرحمن الرحيم ..

السلام عليكم و رحمة الله و بركاته ..


بسم الله و الصلاة و السلام على أشرف خلق الله محمد وعلى آله و صحبه و من والاه ..


ونعيش مع اسم من أسماء الله الحسنى ..

بناء على اقتراح الاخت العزيزة mec_eng نكمل مع اسم يديد من أسماء الله الحسنى .. أسأل الله إنه يفتح علي و ينغرس المعنى بداخلكم خواتي الحبيبات =)

---

هو اسم من أسماء الله الحسنى .. اختاره الله لنفسه .. يبعث فينّا الأمل و الفرحة و الاستبشار و الحماسة .. اسم من أسماءه سبحانه يخلينّا نقبل على الطاعة و العبادات .. وخاصة .. عبادة "الدعاء "..!!
هو إسم الله " المجيــــــــــــــب"

"إن ربي قريـب مجيـــب " ..!!

المجيــــــــــب سبحانه .. واسم الله المجيب له معنييين .. وهما ::
المعنى الاول هو :: المجيب الذي يقابل مسأله السائلين بالإجابة و العطــاء ..!! يعني لو نطق اللسان بالدعاء فاعلمي أن الله تعالى يريد أن يعطيج و يستجيــب لج .. بمنتهى الوضوح .. !!

أما المعنى الثاني :: هو الذي يقذف في قلوب الداعيين وفي قلوب البشر الدعاء .. يعني انتي مثلا قاعدة بالصاله وموقاعد تسوين شي و فجأءة طرى دعاء على بالج و دعيتي فيه .. اول مايطري هالدعاء تذكري المجيـــب اللي ألهمج الدعاء لأنه يريد أن يستجيب لج و يريد أن يعطيج ..!!

حينما قال الرسول عليه الصلاة والسلام " للصائم عند فطره دعوة لاترد "
الرسول عليه الصلاة والسلام كلنا نعرف إنه لا ينطق عن الهوى .. والنبي لما يقول شي ترا مو مجبر يقولنا إن دعوة الصائم عند فطره لا ترد إلا إذا كانت فعلاً لا ترد ..!! يعني اللي بقوله يقيناً إنج لما تكونين صايمة و ايي وقت الفطور ودعيتي هالدعاء يقيننا لا يرد ويستجــــــــــاب .. هذا مثال بسيط و هم في أوقات كثيره مستاجبه الدعاء ..!!

انزين ..

قال تعالى :: "إذا سألك عبادي عني فإني قريب أجيب دعوة الداعي إذا دعان"
ذكرت هالآية القرآنية عشان محد يقول أنا عصيت الله وايد والله ما راح يستجيب لي و و و ..
تفكري قليلا بالآية .. ربي سبحانه قال " أحيب دعوة الداعــــــي إذا دعان" و أحط سبعين خط تحت كلمة >> الداعــــــي << وكلمة الداعي تشمل المؤمن والعاصي .. !! يعني انا الحين اذا دعيت الله راح يستجيب لي ؟! اييي راح يستجيب لج لاتترددين بالدعاء .. !!


---

المجيــب سبحانه .. هو اللي يضمنلج الإجابة فلا تحملي هم الاجابه بل احملي هم الدعاء ..

ولذلك عمر بن الخطاب كان يقول :" أنا لا أحمل هم الإجابة و لكن أحمل هم الدعاء فمتى ألهمت الدعاء عرفت الاجابة معه " << ترا مايقول أحد هالكلام إلا لأنه عرف المجيب سبحانه و تعالى ..

الله سبحانه و عدنا بالاجابة و هذا وعد .. وربي أكييد بلا شك راح يوفي بالوعد .. "ومن أصدق من الله قيلا" فهو الذي أمرنا بالوفاء بالوعود ..

---

انزين .. تبون تحبونّه أكثر ؟! و تشعرون بحبّه لكم بعد ؟!

أول شي ,,
المجيب سبحانه .. لم يحدد وقت أو موعد للدعاء .. يعني أي و قت تروحين تدعينه راح يستجيب لج دام انج موقنة بالاستجابة .. انزين .. تخيلوا معاي شوي لو ان هناك موعد لاستجابة الدعاء وبدون هالموعد ماراح يستجيب لج .. مثلا لو إن موعد الاجابة من 2:30 بليل الى 3:30 بليل .. !! صحيــــــــح ان هالوقت يستجاب فيه الدعاء أكثر .. بس اللي بقوله تخيلي لو بس هالوقت اللي الله راح يستجيبلج ؟! الصعوبة بتكون شكثر ..؟!!
>>الحمدلله إنه ماحط موعد صح << وكل هذا ليش ؟! لأنه يبي يستجيب لنا .. ليش عيل احنا مو قاعد ندعي =(

ثاني شي ,,

تخيلي لو موعد الدعاء بالدور ..!! يعني في دور يقف فيه البشر لكي يستجيب لهم ..!!
بس بوريكم شكثر المجيب سهّل لنا الامور ..

"متى لقيتني وجدتني" ..

ترفعين ايدج تدعين .. مارفعتي ايدج بلسانج ادعي .. يالله من غير لسانج من داخلج ادعيــــــــه .. قوليله يا رب مالي غيرك .. يارب أغثني ..يارب سهل لي ما أخاف تعسيره .. وادعي ..

ليش ماندعي ؟! شنو الشي اللي يمنعنا من الدعــاء .. ياجماعه ربي سبحانه اهوا اللي عرض علينا تعااالوا ادعوا و انا رااااح استجيب لكم و أحل مشاكلكم و أسعد قلوبكم .. ليش في بعض من البشر متكبرة على الله و ماتبي ترفع إيدها و تطلب العون منّه ..!!

وفي شي جميل .. ربي سبحانه صحيح إنه يبينه ندعيه .. واذا صارلنا من زمان مادعينه يسخرلنا مشكلة عشان ندعيـــه و يفرجها عنّا ..!! فلما تييج مشكلة .. على طول تذكري انج من زمان مادعيتي فاستبشري لأنه دام يابلج المشكلة يبيج تدعينه .. واذا دعيتيه يعني يبي يستجيب لج .. فأكثري من الدعاء أخية ..!!

>>يضطر الناس الى المصائب ليعودوا اليه ويدعونه باسمه المجيب ويقولوا يارب نجينا
يضطر السفينة الى الغرق وكانوا بعيدين عنه في قلب البحر ليرفعوا أصواتهم بالدعاء .. أغثنا أغثنا ..
يضطر الانسان فس الصحراء ليتوه ليقول يارب أغثني أغثني ..
يضطر الأمة جميعها للضعف لترفع يديها وتذهب و تعلم انها عبدة مأمورة من الله أغثنا أغثنا ..
---

بعطيكم مثال تحسون بعظمة المجيب ..

مثلا تبين تكلمين صديقتج بشي ضرووووري ومايتأجل ... ولما رختيلها لقيتيها قاعد تكلم وحدة و هالوحدة قاعد تكلمها بموضوع مهم بعد .. فإنتي رحتيلها و قلتيلها بكلمج .. أكيـــد بتقولج فلانة نطري شوي على ما أخلص من اللي قاعد تكلمني و اسمعج .. صح ؟! صح هذا اللي قاعد يصير ؟!

" ولله المثل الأعلى " .. يدعوه الآلاف و الملايين في نفس اللحظة .. خلي ببالج كل واحد من اللي يدعون يدرون ان الله يسمعهم كأنه الوحيد الذي يدعو الله .. الكل مطمئن .. مافي أحد يسّكت أحد عشان يدعي أو يقوله : "اسكت شوية لغاية ما اخلص انا " شفتوا مرة صارت ؟!
طبعا لأ .. عمر ما وحده فينا تضايقت من أحد يمّها يدعي لأنها تخاف ياخذ من وقتها ليش ؟! لأنج عظمتي الله و انتي تدعين و لأنج موقنة أنه السميع البصير ولا يشغله سمع عن سمع ولا تختلط عليه الأصوات .. !!

إذا اسم الله المجيب يعرفنا ببقية أسماءه الحسنى كالسميع و البصير و القدير ... الخ

---

انزين شي ثاني .. وإذا ما أثر فيج كل اللي قلته و عطاج حماس انج تدعين هالشي بإذن الله راح يخليج تدعين و ماتوقفين =)

جاء في الحديث القدسي أن الله تعالى يقول ,,

" يا عبادي .. لو أن أولكم و آخركم وإنسكم و جنكم قاموا على صعيدٍ واحد فسألوني فأعطيت كل واحد منهم مسألته ما نقص ذلك مما عندي إلا كما ينقص المخيط إذا أدخل البحر "

يعني لو كل البشر و كل الجن اللي موجودة بالأرض دعوا الله والله استجــاب حق كل واحد منهم وعطاه اللي يبي .. هالعطاء لا ينقص من ملك الله شيء ..!! إلا كما ينقص المخيط -الإبرة- إذا دخلت البحر ..!!


المجيب .. ينفق على عباده بسخاء ..

يالله قولي طلبج ؟! تبين الفردوس ؟! تبين تصيرين مهندسة, طبيبه ؟! تبين الله يشافي احد تعرفينه من مرض صعب ؟! قوليلي شنو حجم الطلب اللي تبينه ؟! شكبره في خزائن السماوات و الارض ؟! لاتظنين ان طلبج مستحيل و حلم بالنسبة لج .. لاء .. المجيب هو الذي راح يحققلج كل اللي تبينه اذا رحتيله و لجأتيله .. تبين تحققين حلمج ؟! ألحي بالدعاء وراح يتحقق بإذن الله ,,


---


أنا طولت عليكم ..

ومابيكم اتملون .. بس للحديث بقية ..

والموضوع مانتهى ..

اتمنى وصل المعنى للجميع ..

وناطرة تفاعلكم عشان بكمل الموضوع =)


سبحانك اللهم وبحمدك أشهد أن لا اله إلا أنت أستغفرك و أتوب إليك ..

والسلام عليكم و رحمة الله وبركاته


تحياتي دعاء الطائي =)

يسللللللموا